la poesia dell'amico Vincenzo Adamo

Postu fissu
‘Na vota ‘u postu fissu era cirtizza
era la basi di la sucità
pi cu s’accuntitava era ‘a sarvizza
pani ri simmula era â parità

Poi vinni la tiuria chi ‘u fissu stanca
e tanti s’adeguaru ‘stu pareri
cu si firriau lu munnu a destra e a manca
e cu seguennu si canciau ‘a mugghieri

‘Sta tiuria ritorna cû travagghiu
p’alliviari li peni di ciascunu
sicuramenti ci sarà lu sbagghiu;
lu saturu nun criri a chiddu addiunu.

Cu fa nenti cancia spissu lu misteri
comu cancia li vistiti chi si prova
pi strata già pi tutti è cavaleri
cavaleri du lavoru chi nun trova .

Ora però pò essiri cuntenti
lu ventu già si senti ch’è canciatu
stancu oramai di tantu fari nenti;
sicuru chi virrà ricollucatu

Lu munnu nun firria ‘ntunnu pi tutti
pir iddu lu scinariu ‘un è canciatu:
la nova tiuria nun darà frutti
fissu resta oramai disoccupatu.

Vincenzo Adamo