brani popolari che celebrano le tessitrici e il lvoro di esse (la Sicilia di una volta)

Chi bedda figghia ch'avi stu viddanu
ch'è comu fussi 'na bannera d'oru!
Quannu si metti l'agugghia a li manu,
pari chi cusi cu lu filu d'oru;
po', quannu sedi 'ntr lu so' tilaru,
fa ghiri la navetta pri lu volu;
ed iu, l'amaru! guardu di luntanu,
li botti sentu e di la pena moru!

La stidda affàccia lucenti e pulita,
sempri chi pensu pri l'amuri caru,
sempri chi pensu a chidda sapurita,
chidda chi tessi 'ntra lu sò tilaru:
e la matina mi tessi la sita,
a menzujornu lu villutu chiaru;
comu luci la tila a la me' zita!
luci comu luna di jinnaru!

Cci fussi cui mi dassi modu e 'ndrizzu
di veniri a la casa dda' nni tia,
t'ajutiria a passari lu lizzu,
li fila rutti ti l'attacchiria:
eu puru ti faria 'n'àutru survizzu
ca tu tississi, ed eu 'ncatasciria;
e quali giuvinottu faria chissu,
dj inchiri canneddi comu mia?

Batti, navetta mia, tilaru batti,
quantu l'amuri miu senti li botti;
tessi-tissemu, dui canni su' fatti,
guarda sta tila chi mi veni forti!
E vi la tessu cu 'ncegnu e cu arti,
batti, tilaru, ca è mezzanotti:
a la lagnusa lu sonnu l'abbatti,
nun suca a la minnedda di la sorti.

Quantu si bedda, misa a lu tilaru,
'nta ssu tilaru chi vali un trisoru!
li cosci sunnu di gran prezzu raru,
li pidacchi abbirsati, e sùgghiu soru;
la càssita e lu pèttini 'un cc'è paru,
la navittedda chi pigghia lu volu!
Duni la botta e la tila va 'n paru,
botta pri botta mi trema lu cori!

La bedda a lu tilaru tessi e canta,
e tessi e canta cu tanta mastrìa,
tessi a la tila dilicata e bianca
pri quannu chi cci servi, armuzza mia!
e tessi notti e giornu e mai nun stanca,
ddi canzuneddi, 'na vera musìa!
cu' passa, 'mpinci, e lu cori cci manca,
li senzj si nni vannu in fantasia.

Ciuri di linu.
Quantu va na' carera a lu tilaru,
mancu un damanti priziusu e finu!

Ciuri d'aranci.
Bedda tu tessi e tissennu mi vinci;
bedda, tu canti, e lu me' cori chianci.

Ciuri di viola.
La bedda, mentri tessi a lu tilaru,
vi canta 'nnamurata e vi cunsola!