'A FORFICIA di N. Martoglio

- Gesù e Maria, chi razza di carusa!...
Sempri avanti 'a tuletta, pircantata!...
Chiù brutti su', chiù vannu di parata;
ma chista, poi, è vera vummicusa!...

Comu ci spèrcia, 'ranni Diu: sciancata,
'na nasca comu chi, lintiniusa!...
Chi è ca frighi, pezza di tignusa?...
Largu, ca passa a siccia 'nfarinata!...

Vardati chi superbia!...Salaratu!...
Cu' è ca passa, 'a vara, 'a cannalora,
'a rigina, 'a carrozza d' 'u Sinatu?...

Prestu, carusi...ca niscìti fora!...
Purtàticci un lannò cusciniatu...
E ci 'mpajati 'u sceccu da scalora!...